زائچہ دیکھا تھا کل شب تو یہ معلوم ہوا
تیرے گھر آنے کا امکان بھی معدوم ہوا
۔۔۔۔۔۔۔
سال بھر پہلے فقط گھر کی فضا تھی مسموم
اس برس شہر کا ہے شہر ہی مسموم ہوا
۔۔۔۔۔۔۔۔۔۔۔۔۔۔۔۔
اس سے بچھڑا ہوں تو اب راز کھلا ہے مجھ پر
میں جو محروم محبت ہوا مرحوم ہوا
۔۔۔۔۔۔۔۔۔۔۔۔۔۔۔۔۔۔۔۔۔۔۔
درد کے پھول سبھی میرا مقدر ٹھہرے
فکر کا رزق ترے در سے جو مقسوم ہوا
۔۔۔۔۔۔۔۔۔۔۔۔۔۔۔۔۔۔۔۔
کسقدر تیزی سے بدلی ہیں نگاہیں اس نے
بزم یاراں میں مگر پھر بھی وہ معصوم ہوا
۔۔۔۔۔۔۔۔۔۔۔۔۔۔۔۔۔۔
مطمئن ہے وہ بہت دیکھ کے مغموم مجھے
رات بھر سویا نہیں میں جو وہ مغموم ہوا
۔۔۔۔۔۔۔۔۔۔۔۔۔۔۔۔۔۔
کیوں مرے لفظوں کی حدت کو نہیں سمجھا ہے تو
کیوں غلط بات کا میری کہو مفہوم ہوا
۔۔۔۔۔۔۔۔۔۔۔۔۔۔۔
وہ جو موجود رہا میری دعائے شب میں
وہ دعاؤں سے مری آج سے محروم ہوا
۔۔۔۔۔۔۔۔۔۔۔۔۔۔۔

ساتھ چھوڑا ہے مقدر نے کچھ ایسا صفدر
حد تو یہ ہے میرا قاتل بھی ہے مظلوم ہوا
________